Inallukoy ti National Security Council dagiti mangngalap idiay Palawan a mapan latta iti kabaybayan ken agkalap idiay West Philippine Sea ta karbengan dayta iti tunggal Pilipino tapno aramaten ti natural resources iti paset ti pagilian.
Ti addang ket impasigurado ni NSC Assistant Director General Jonathan Malaya kadagiti mangngalap idiay Northern Palawan a suportaran ida ti gobierno.
Segun ken ni Malaya, ti kabarbaro nga enacted Philippine Maritime Zones Act, UNCLOS ken ti 2016 Arbitral Ruling ket nalawag a nakayetnag ti legal rights idiay West Philippine Sea isu nga allukoyenna a mapanda agkalap.
Bayat ti Northern Palawan Fisherman’s Congress ket nakipaset ti 170 a mangngalap manipod kadagiti ili ti Coron, Culion, Linapacan ken Busuanga kaduada dagiti mangibagi ti Bureau of Fisheries and Aquatic Resources (BFAR), Philippine Coast Guard (PCG), Armed Forces of the Philippines, Department of Social Welfare and Development ken local government units.
