Idurduron ni Representative Nathan Oducado ti gakat tapno maaddaan ti komprehensibo a legal framework ti panang-regulate ti surrogacy ken assisted reproductive technology iti pagilian.
Segun ken ni Oducado, ti Surrogacy Regulation Act (House Bill 8467) ket gagemna a salwadan dagiti karbengan ken kinatalged dagiti surrogate mother, dagiti kayat na ti agbalin nga ina ngem saan da a maaddaan ti anak iti natural a wagas, ken dagiti naiyanak babaen iti surrogacy.
Daytoy ket insingasing ti agpampanday linteg kagiddan ti selebrasion ti Mother’s Day idi kalman, May 10.
Segun ti kongresista, ti aldaw dagiti Ina ket agserbi kuma a palagip a masapul nga ayaten, bigbigen ken respetoen tayo isuda.
Iti salinong ti gakat, masapul a maaddaan ti life health insurance coverage para kadagiti surrogate mother ken dadduma pay a benepisio.
