Nadundunor ti nagmaneho iti motorsiklo ta nakadinnungparna iti maysa a van iti national highway idiay Barangay Paing, Bantay, Ilocos Sur idi rabii, July 13, 2025.
Segun ti Bantay Municipal Police Station, agpapabagatan a direksyon ti Toyota Hi-Ace Super Grandia idinto nga adda iti bangir a direksyon ti Yamaha Mio Sporty ket agpadada nga adda iti inner lane.
Naammoan a nag-overshot iti linya ti nakamotorsiklo isu nga immagaw iti linya iti van a gappuanan iti panagdinnungparda.
Gapu dayta ket nadundunor ti nakamotorsiklo nga insigida nga inarayat dagiti kameng ti Municipal Disaster Risk Reduction and Management Council ket impanda iti Ilocos Sur Provincial Hospital, Gabriela Silang para iti pannakatamingna idinto a saan a naan-ano dagiti nakalugan iti van.
Naduktalan a naka-inom iti arak ti nagmaneho ti motorsiklo idi napasamak iti aksidente.
