Dead on arrival iti ospital ti maysa a babai kalpasan iti aksidente a nakairamanan ti maysa a utility vehicle truck ken kurong-kurong iti national highway idiay Barangay Bulag, Bantay, Ilocos Sur itay agsapa, May 30, 2026.
Ti nagmaneho iti Isuzu Utility Vehicle truck ket lalaki nga agtawen iti uppat a pulo ket pito, naasawaan nga agnaed idiay Bantaoay, San Vicente.
Ti nagmaneho met iti red Pinoy 155 tricycle wenno kurong-kurong ket lalaki nga agtawen iti innem a pulo ket uppat nga agnaed idiay Barangay Naguiddayan, Bantay; kaduana ti mays a babai nga addan iti husto a tawen nga agnaed idiay Barangay Bulag East, Bantay.
Iti pannaki-uman ti Bombo Radyo Vigan ken ni PLt. Donne Alfred Gamueda iti Bantay Municipal Police Station, agpapadaya a direksyon ti truck idinto a dumaldalyasat iti bangir a direksyon iti kurong-kurong idn kellaat a nagsikko ti kurong-kurong iti kannigid a mapan iti gasolinaan a gappuanan iti panagdinnungparda iti utility vehicle truck.
Segun ken ni Gamueda, naawaan ti kontrol ti utility vehicle truck isu a naudungpar pay iti nakaparking a white Ford Ranger.
Gapu ti impact iti aksidente ket naisina iti side car iti motorsiklo ken naibansag dagiti nagkalugan a gappuanan iti pannakadundunor iti agduduma a paset iti bagida isu a naipanda iti Ilocos Sur Provincial Hospital –Gabriela Silang ngem naideklarar a dead on arrival ti babai idinto a kritikal ti kasasaad ti driver.
Saan met a naan-ano ti driver ti utility vehicle truck ngem naipan latta iti isu met laeng nga ospital para iti medico-legal examination.
No pay kasta, tumulong ti driver ti utility vehicle truck iti magastos para kadagiti nagkalugan iti kurong-kurong.
