Naipilan ti kaso nga estafa kontra kadagiti dua a lalaki a nanglimlimo ti agarup P91, 800 a gatad dagiti 20 a burias manipud iti maysa a negosiante idiay Barangay Bulag, ili ti Bantay.
Ti biktima ket agtawen iti uppat a pulo ket lima, tubo ti Brgy. Lydia, Marcos, Ilocos Norte ngem agnanaed idiay Barangay Bulag.
Dagiti met suspek ket dua a lalaki, agpada nga addan iti husto a tawen, residente idiay Barangay Sacuyya Norte, Santa, Ilocos Sur.
Iti pannakiuman ti Bombo Radyo Vigan ken ni PLT Ronnie Corpuz, Deputy Chief of Police ti B antay Municipal Police Station, pinasingkedan na a ti biktima ken dagiti dua a caretaker ket personal nga impakaamoda iti kapulisan ti mapapati a swindling incident.
Segun kadagiti nagreklamo, iti alas-tres ti malem idi Setyembre 20, 2026, napan ti maysa a suspek ken dagiti kaduana a tallo nga indibidwal tapno alen dagiti 20 a burias.
Segun ken ni Corpuz, iti dayta a gundaway, pinalubosan ti maysa a caretaker nga alaenda dagiti burias gapu ta namati nga addan ti napagpatangan ti kadua na a caretaker ken iti maysa a suspek.
Dagus nga innala ti grupo dagiti burias ket inkarga da iti dua a kurong-kurong, ngem kalpasanna, naammuan nga awan ti napasamak a pormal a panagpatang ti maysa a caretaker ken ti maysa a suspek.
Kalpasan ti mano nga aldaw, awan metten ti mauray ti biktima a bayad dagiti taraken na isu nga impakaammo na kadagiti otoridad ti mapapati a panakalimlimo-na.
