Natay ti driver ken maysa a pasahero ti Sports Utility Vehicle (SUV) kalpasan a naidungparda iti maysa a truck iti national highway idiay Barangay Bananoang, Bantay, Ilocos Sur itay ala una iti parbangon.
Ti Mitsubishi Montero ket nagluganan dagiti innem a tattao pakairamanan ti driver idinto a ti Blue Giga Truck ket minaneho ti maysa a lalaki.
Iti pannaki-uman ti Bombo Radyo Vigan ken ni PLt. Ronie Corpuz iti Bantay Municipal Police Station, bayat ti panagdalyasat dagiti dua a lugan iti agsinnumbangir a direksyon iti nasao a paset ti highway ket kellaat lattan nga immagaw ti SUV iti linya nga ayan ti truck a gappuanan iti panagdinnungparda.
Segun ken ni Corpuz, gapu ti impact ket nakaru ti damage iti dua a lugan ken rason ti nakatayan ti driver ken maysa a pasahero ti SUV, ken nakadunoran dagiti uppat pay a pasahero ken uray ti driver ti truck.
Nammoan a naggapu idiay Laoag, Ilocos Norte ti SUV idi napasamak iti aksidente.
No pay kasta ket awan pay laeng iti resulta iti medico legal a naisayangkat kadagiti karaman iti aksidente isu a saan pay a maibaga ti kapulisan no posible a naka-inom iti arak ti driver sakbay iti aksidente.
