Awan iti foul play iti napasamak a pannakatay ti maysa a lalaki kalpasan a nasarakan iti kataltalunan bayat a kaabayna iti motorsiklona idiay Barangay Capangdanan, Bantay, Ilocos Sur.
Ti lalaki ket estudiante nga agtawen iti duapulo ket maysa, agnaed iti Barangay Guimod, Bantay.
Iti pannaki-uman ti Bombo Radyo Vigan ken ni PLt. Ronie Corpuz iti Bantay Municipal Police Station, mapapati a saan a napakadaan ti lalaki iti agsikko a paset ti kalsada iti nasao a lugar isu a posible a nagderetso isuna iti kataltalunan a gappuanan metten iti pannakaitama ti manibela ti motorsiklo iti ulona isu a saanen a nakabangon pay.
Segun ken ni Corpuz, saan a nakausar ti lalaki iti helmet idi napasamak iti mapapati a pannaka-aksidentena ken patienda a napasamak dayta iti alas sais agingga alas siete iti rabii idi August 1, 2026 isu nga idi nasarakan iti bigat iti August 2 ket nasikkilen ti bangkay.
Patien dagiti otoridad nga awan iti nakapansin iti lalaki idi naaksidente ta posible nga idi napasamak ket nairana a napigsa iti tudo.
