Idurduron ti Department of Education (DepEd) iti napapigsa nga addang tapno yatiddog ti access dagiti mangisursuro iti pampubliko a pagadalan iti international scholarship ken exchange programs, kas paset panagtignay a mapasayaat iti basic education iti pagilian.
Iti “Tech Beyond Borders: Global Scholarship and Exchange Fair” a napasamak iti SEAMEO INNOTECH idi May 29, pinagtipon ti DepEd dagiti scholarship providers, exchange partners, dagiti mangisursuro tapno mangted iti napadaras nga access kadagiti oportunidad iti panagadal ken panagsanay iti dadduma a pagilian.
Segun ken ni Education Secretary Sonny Angara, napateg a maikkan dagiti mangisursuro a Pilipino iti global exposure tapno maipayam-ammo ken maisubli iti pagilian dagiti kabaroanan a wagas iti panagsuro.
Gagem ti programa a pagbalinen a nadardaras iti panag-access iti impormasyon maipanggep ti scholarship babaen iti maysa a one-stop platform para iti aplikasion, requirements ken proseso.
Kinuna ti DepEd a sumupsuportar dayta iti bilin ni Pres. Ferdinand Marcos Jr. a papigsaen ti global competitiveness dagiti mangmangged a Pilipino ken maipangato ti lebel iti edukasyon iti pagilian.
