Natay ti nagmaneho ti motorsiklo gapu iti pannangdungparna iti maysa a kotse iti national highway idiay Barangay Margaay, Narvacan, Ilocos Sur.
Ti nagmaneho iti puraw a Mazda 3 ket maysa a medical doctor, agtawen iti tallopulo ket maysa, addaan ti driver’s license nga agnaed idiay Barangay Tanglagan, Calanasan, Apayao.
Ti met nagmaneho ti nalabbaga a Yamaha Vega Force ket agtawen iti limapulo ket uppat, mannalon nga agnaed idiay Barangay Aquib, Narvacan a saan a nagaramat iti helmet.
Sakbay iti insidente ket agturong iti bagatan a direksyon ti kotse idin nadanonna iti nasao a lugar kangrunaan iti asideg ti Sunrise Inland Resort kellaat nga immagaw ti linya ti nakamotorsiklo a napaspas iti patarayna isu a nagdinnungparda uray impadas ti nakakotse a liniklikan ngem saanen a nakalisi pay.
Gapu dayta ket nagsagaba ti nakamotorsiklo iti multiple fractures ken dunor iti agduduma a paset iti bagina idinto a saan a naan-ano ti nagmaneho ti kotse.
Agpada a naipan dagiti dua a driver iti Ilocos Sur District Hospital – Narvacan para iti pannakatamingda ngem ti driver ti motorsiklo ket naideklarar a dead on arrival.
