Agpada a nadunor dagiti nagkalugan iti motorsiklo kalpasan a na-hit and run-da babaen ti maysa a pick-up iti national highway idiay Barangay Bulbulala, Santiago iti alas singko kuarentay singko idi kalman, March 29, 2026.
Ti nagmaneho iti red Honda Click 125 motorcycle ket agtawen iti sangapulo ket siam, addaan ti student permit nga agnaed idiay Barangay Bisangol, Banayoyo; ken backrider-na nga agtawen iti sangapulo ket innem a taga-Barangay Elefante, Banayoyo nga agpada nagsuot iti helmet; idinto a saan a nabigbig ti nagmaneho iti nangisit a pick up.
Agpada nga agturong iti bagatan a direksyon dagiti dua a lugan idin nadanonna iti nasao a lugar kangrunaan iti agsikko a paset ket bayat nga adda iti main lane dagiti nakalugan iti motor ken kalalaingan laeng iti panagpatarayda ket kellaat lattan a sinagid ida ti pick-up a naggapu iti likod ken insigida a pimmanaw iti nasao a lugar.
Pinakaammoan ti Santiago Municipal Police Station ti PTOC iti nasao nga insidente para ti dragnet kadagiti kaasideg nga ili.
Nagsagaba iti gasgas dagiti nagkalugan iti motor isu nga agpadada a naipan iti Candon General Hospital, Candon City para iti pannakatamingda.
