Nasarakanen ti traysikel nga immunan a naipakaammo a mapukpukaw idiay Candon City, Ilocos Sur.
Ti nasao a Black Honda TMX 125 nga adda color yellow sidecar-na ket kukua ni Edwin Pasahol, agtawen iti uppat a pulo ket walo nga agnaed idiay Barangay Talogtog, Candon City.
Alas dos idi kalman ket bayat ti follow-up investigation maipanggep iti naireport a mapukpukaw a traysikel ket timmawag ni Richard Gadong nga agtawen iti limapulo ket walo, naasawaan, mannalon a taga-Barangay San Nicolas, Candon City ket impakaammona kadagiti otoridad nga adda nakitana a naabandona a traysikel iti bakante a lote iti lugarda isu nga insigida a nagresponde dagiti otoridad.
Nakumpirmaranda a ti nasarakan a traysikel ket isu ti traysikel nga immunan a naireport a mapukpukaw.
Naipan ti traysikel iti PNP station para ti documentation ngem insigida met laeng a naiturn over iti akin-kukua.
