Nakapagsaritan ti pamilia ti driver ti MPV ken ti pamilia ti pedestrian a nadungpar iti national highway idiay Barangay Dili, Sta. Cruz, Ilocos Sur.
Ti nagmaneho iti Mitsubishi Xpander Cross ket agtawen iti pitopulo ket innem nga agnaed idiay Lorenzo South, Sta. Rosa, Laguna.
Ti met pedestrian ket agtawen ti limapulo ket innem nga agnaed idiay Barangay Dili, Sta. Cruz.
Iti pannaki-uman ti Bombo Radyo Vigan ken ni PMaj. Paul Vinsent Tadeo a Chief of Police iti Sta. Cruz Municipal Police Station, immanugot ti driver ti MPV a sungbatan amin a gastos iti ospital ti nadungparna a pedestrian nga ita ket natalgeden iti kasasaadna kalpasan a nadunor iti ulona.
Maipalagip bayat iti panagturong iti bagatan a direksyon ti MPV ket bimmalasiw ti pedestrian iti highway manipod iti daya a nagturong iti laud a direksyon a gappuanan iti pannakadungpar kenkuana ti MPV.
