Natalged a nasarakan ti maysa a mangngalap kalpasan a naireport a mapukpukaw idiay Barangay Pug-os, Sinait, Ilocos Sur.
Ti lalaki nga immunan a naireport a mapukpukaw ket ni Raymund Vidal Ladaran, agtawen iti tallopulo ket maysa, naasawaan, mangngalap nga agnaed idiay Barangay Pug-os, Sinait.
Iti pannaki-uman ti Bombo Radyo Vigan ken ni PCpt. Bryan Romeo Lopez, impakaammo kadakuada ti Barangay Kapitan iti Pug-os, Sinait a saan a nakaawid iti rumbeng nga oras ti maysa kadagiti mangngalap a napan iti kabaybayan idi kalman, February 20, 2026 isu a nagrespondeda kaduada dagiti agduduma nga ahensya ken concerned citizen.
Segun ken ni Lopez, adda kakuyog a napan iti kabaybayan ni Ladaran ngem agdudumada iti bangka nga inusarda ket immuna a nakaawid dagiti kakaduana ngem saan a simmaruno ni Ladaran.
Naammoan a saan a dagus a nakaawid ni Ladaran gapu ta nadadaelan ti bangkana isu a napilitan a nangigalot iti rama a pagkalapanna koma.
Babaen iti panagtitinnulong dagiti agduduma nga ahensya ken padana a mangngalap ket naisayangkat iti search and rescue operation ket dagiti met laeng padana a mangngalap iti nakakita kenkuana iti paset iti kabaybayan idiay Currimao, Ilocos Norte.
