Natay ti maysa a senior citizen a lalaki gapo ti pannakalmesna iti kabaybayan idiay Barangay Pug-os, Cabugao, Ilocos Sur.
Nabigbig ti biktima a ni Nestor Ricarte Viriña, agtawen iti innem a pulo ket innem, naasawaan, ken agnaed ti Barangay Quezon, Cabugao, Ilocos Sur.
Segun ken ni Darrel James Montero Dela Cruz, apo ti biktima, alas sais y media ti malem idi Hulyo 22, nagdigdigosda iti kabaybayan kaduana ti biktima ken kasinsinna a ni Joshua Castillo idin nakita ti biktima ni Castillo a naiyanod gapo iti napigsa a dalluyon isu nga inarayatna ti apona ngem karaman met laeng a naiyanod.
Nagpatulong ni Dela Cruz kadagiti residente nga adda iti nasao a a lugar ket naalawda dagiti dua ngem awan puot ti biktima.
Naipaagas iti Suero General Hospital ti biktima ngem naideklarar a dead on arrival.
