Kaso a theft ti sangwen ti suspek a nagtakaw iti bag iti maysa nga agtagilako iti Vigan City Public Market iti Barangay 8, Vigan City, Ilocos Sur.
Ti suspek ket ni Michael Evangelista Pipo, agtawen iti uppat a pulo ket innem, naasawaan, awanan ti trabaho nga agnaed idiay Zone 1, Bantay idinto a ti biktima ket ni ket ni Irene Pilot Palapala, agtawen iti innem a pulo ket maysa, naasawaan, negosyante nga agnaed idiay Barangay Sagpat, Bantay.
Iti pannaki-uman ti Bombo Radyo Vigan ken ni PLt. Col. Reynaldo Mendoza manipod Vigan City Police Station, nagturong ti biktima iti Police Station a nangipakaammo a ti belt bag na a naglaon ti Identification Cards ken kuarta nga aggatad ti P8,000 ket mapukpukaw ket iti panag-review iti CCTV footage naduktalan a tinakaw ti suspek .
Iti hot pursuit operation ket nakemmeg ti suspek ket narekubre ti belt bag ngem awanen dagiti linaonna.
Segun ken ni Mendoza, awan ti rekord iti suspek iti Vigan City Police Station ngem makikamkammayetdan iti Bantay Municipal Police Station tapno maamoan nu adda datin a rekordna inaig iti nasao nga aramid.
VIDEO – PLT. COL. REYNALDO MENDOZA
