Nadunor iti agduduma a paset ti bagi ti nagmaneho ti motorsiklo kalpasan a natulid iti kalsada gapu iti pannakadungpar na ti pedestrian idiay Barangay Barangobong, Sta. Lucia, Ilocos Sur.
Ti nagmaneho ti Rusi flash 150 motorcycle ket agtawen ti tallopulo ket lima, residente ti Poblacion Sur, Santa Maria.
Ti met pedestrian ket agtawen ti uppat a pulo ket uppat, residente ti Barangay Palali sur, Santa Lucia.
Basar iti CCTV footage, bimmalasiw ti pedestrian iti kalsada ket dita a nadungpar isuna ti napaspas a motorsiklo a naggapu iti abagatan a direksion.
Natulid iti kalsada ti nagmaneho ti motorsiklo ket nadunor iti agduduma a paset ti bagi na a naipan iti balay pagagasan para ti naan-anay a pannakatamingna.
Saan a naan-ano ti pedestrian iti napasamak nga insidente ken nagkedked daytoy a dumalan iti medical examination.
