Inyanunsio ni Senate President Pro Tempore Sherwin “Win” Gatchalian ti work-from-home (WFH) arrangement para iti amin nga opisial ti Senado ita nga aldaw, Hunyo 4, gapu iti kallabes a napasamak a maipagarup a nakaapekto iti operasion ken morale dagiti empleyado.
Iti maysa a Senate advisory, pinasingkedan ni Gatchalian a gagem ti addang tapno mapagtalinaed ti neutrality ti bureaucracy ti Senado.
Immuna daytoy, nagiruar ti memorandum ni Senador Alan Peter Cayetano ket impaganetget na a matuloy amin a nakatuding a panagdengngeg ita nga aldaw, pakairamanan ti Blue Ribbon Committee hearing.
Segun ken ni Cayetano, agtalinaed a nakalukat ti Senado ket nagbalaag a saan nga i-padlock daytoy gapu ta matuloy iti panagdengngeg ti komite.
Kabayatanna, impaganetget ni Gatchalian a ti decision a saan nga agisayangkat ti official business ket mainaig iti panagbaliw iti liderato ken re-organisasion dagiti komite iti Senado.
