Mangnamnama ni Manila Representative Bienvenido “Benny” Abante Jr. nga agsubli ditoy pagilian dagiti agkakabsat a da Senador Alan Peter ken Pia Cayetano.
Kinuna ni Abante, nasken nga agtultuloy ti panagtabuno dagiti agkabsat a Cayetano iti impeachment trial ken makipaset iti panagbutos iti pannakasentensia ni Bise Presidente Sara Duterte.
Impaganetget ni Abante nga adda punto ti saludsod ni Senador-judge Erwin Tulfo no ania ti threshold wenno bilang ti botos a kasapulan tapno maited ti sentensia iti impeachment case ni VP Duterte.
Daytoy ket gapu ta umad-adu dagiti senador a saan a dumar-ay iti hearing gapu iti nadumaduma a rason isu a mabalin a saanda met a makipaset iti panagbotos.
Karaman ditoy da Senador Rodante Marcoleta ken Jinggoy Estrada nga agpada a nakabalud, ni Senador Ronald Bato Dela Rosa nga aglemlemmeng idinto nga adda met ni Senador Loren Legarda iti sabali a pagilian malaksid pay kada senador Pia ken Alan Cayetano.
