Nalpasen ti Forensic Group iti Philippine National Police (PNP) ti imbestigasyon iti pammaltog iti Senado idi May 13 ken naipasan dagiti naduktalanda iti PNP-Criminal Investigation and Detection Group (PNP-CIDG).
Segun ken ni PNP Forensic Group Director Col. Pierre Paul Carpio, naipada amin ti anggulo a rumbeng a maipada iti lugar iti krimen ken iti matching iti agduduma nga ebidensya.
Impakita pay ti opisyal ti 3D scanning a naisayangkat bayat iti insidente ken ti trajectory wenno direksyn dagiti bala iti hallway.
Maibasar dayta, amin nga abot iti bala ket nagtaud kadagiti gunshot a nairekord mismo iti uneg iti pasdek.
Iti panagadal ti crime scene, nagaramat ti grupo ti “blue box” tapno ipakita iti pakabuklan a nakapasamakan iti krimen ken no kasano a naisayangkat ti Scene of the Crime Operations (SOCO).
Immunan nga inruar ti CIDG ti maysa a CCTV footage a mangipakita ken ni suspended Senate Sergeant-at-Arms Mao Aplasca nga immuna a nagpaputok iti paltog a gappuanan ti panagbales ti kameng ti National Bureau of Investigation (NBI).
Sumagmamano nga oras kalpasan iti riribok ket pimmanaw iti premises ti Senado ni Senador Ronald “Bato” dela Rosa, ta temporaryo a nagpakustodiya iti baet iti sangsangwenna nga arrest warrant manipod International Criminal Court (ICC).
