VIGAN CITY- Pinatalgedan ni Supt. Jugith Del Prado , hepe ti Vigan City police station , a sumangsango iti uppat a bilang iti kaso a panagrames ken agsusukot a kaso ti robbery ti napapatay a ni Joseph Pido a taga Sitio Nalasin, Camanggaan, Vigan City ta pinaltugan dagiti saan a nabigbig a suspek iti ruar ti pagtaengan da idi naminsan a rabii.
Segun kenni Del Prado, tawen 2015 idi naipila ti kaso a rape kontra iti suspek idinto a ti kaso a robbery ket idi 2009, ken 2013 ,sabali pay ti kaipilpila a kaso itay kallabes gapu iti mapapati a pannakainaig na iti pannakatakaw kadagiti kalding iti lugar da.
Malaksid iti dayta, sakbay iti krimen ket naireport ti biktima inaig iti mapapati a panagpaputok na ti paltog a maysa kadagiti imimbestigaran dagiti otoridad a motibo iti pannakapapatay na.
Maipalagip a matmaturog ni Pido ,kadwa na ti karelasyon na a ni Efren Fabillaran idi dimteng dagiti innem a suspek ket pinalto-paltogan da ti biktima ngem saan da nga inraman ti kadwa na a ni Fabillaran.
Nasurok dwa pulo a kapsula ti armalite, caliber 38 ken calibre 45 a paltog ti naala dagiti otoridad iti nakapasamakan ti krimen.
