VIGAN CITY- Napaneknekan a marijuana ti naala ken ni Rusty Kevin Raquel nga agtawen iti dua pulo ket uppat a taga-Ampandula, Santa a nakemmeg iti buy-bust operation iti uneg ti pagkaskaseraan na idiay Tamag, Vigan City idi naminsan nga aldaw.
Segun ken ni Police Superintendent Dexter Paredes, hepe ti Vigan City police station, pati dagiti alikamen iti panagaramat ti marijuana a naala nga ikot ti suspek ket nagpositibo iti maregmeg ti marijuana isu a tallo a kaso ti inpila da kontra kenkuana, daytoy iti panaglabsing ti Section 11, Section 12 ken Section 15 ti Republic Act 9165 wennu Comprehensive Dangerous Drugs Act of 2002.
Inlawlawag ni Paredes a malaksid iti tallo a supot ti marijuana a naala iti ikot ti suspek ket maibilang pay a possession wenu ikot na iti dakdakkel a bloke ti marijuana a naala da iti uneg ti kwarto na.
Ti suspek ket graduating student ti University of Northern Philippines (UNP) iti kurso a Bachelor of Science in Mathematics.
