Impanawagan ti Kilusang Mayo Uno iti Department of Justice ti pannaka-wayawaya dagiti tallopulo a kamengda a nakaibalud iti agduduma a pagbaludan iti pagilian.
Segun ken ni Kilusang Mayo Uno Secretary General Jerome Adonis, kiniddawda ken ni Justice Secretary Jesus Crispin Remulla a waya-wayaan dagiti amin a political prisoner sakbay ti State of the Nation Address ni President Ferdinand Marcos Jr.
Inlawlawagna nga araramiden laeng ti trade unionists ti akemda tapno maaddaan ti naurnos a panagtrabaho dagiti mangmangged a Pilipino, agbalin a maikalintegan ti sueldo ken kaadda dagiti benepisyo a nakailanad iti constitutional ken labor rights.
Inallukoy pay ti grupo a waswasen ti National Task Force to End Local Communist Armed Conflict wenno NTF-ELCAC ken ipaay ti hustisya kadagiti maibagbaga a biktima ti panagabuso idi napalabas nga administrasyon.
