Inkalintegan ti Malakanyang nga awan ti “premature” ti sarita ni Pres. Ferdinand Marcos Jr. maipanggep ti mapapati a pannaka-detain ti dati a House appropriations panel chair a ni Zaldy Co idiay Czech Republic.
Segun ken ni Palace Press Office Usec. Claire Castro, husto ti impormasyon ti presidente a ni Co ket adda iti kustodiya iti Czech authorities ken na-hold iti garawna, uray saan nga opisyal nga “arrest” a kas iti inlawlawag ti Department of Justice (DOJ).
Inlawlawag ni Castro a ti sarita a nakemmeg nga inusar ti presidente ket general ken mabalin a ti kayatna a sawen ket pannaka-hold wenno restriction iti garaw ken saan a kasapulan ti legal arrest.
Kabayatanna, kinumpiramaran ti DOJ a ni Co ket saan a nakemmeg no diketdi nalapdan laeng gapu iti panaglabsingna iti immigration rules kalpasan iti mapapati a pinanggepna a dumalyasat ti Czech-German border nga awan ti travel documents-na.
