Inlawlawag ti Department of Justice (DOJ) nga umuna a lumasat ti kaso nga extradition ti lider ti Kingdom of Jesus Christ a ni Pastor Apollo Quiboloy iti korte sakbay a mayakar iti Estados Unidos.
Impaganetget ni DOJ spokesperson Atty. Polo Martinez a masapul nga umuna a maiserbi ti extradition arrest warrant ken masapul a maangay ti hearing tapno maikeddeng ti korte no adda umdas a pakaibatayan ti kiddaw ti US.
Inruar ti Makati Regional Trial Court (RTC) idi Biernes ti extradition arrest warrant kontra kada Quiboloy ken dagiti kaduana nga akusado a da Teresita Tolibas Dandan ken Helen Panilag mainaig iti kaso a human trafficking, sex trafficking, conspiracy ken bulk cash smuggling iti US.
Nangipaulog pay ti korte iti Hold Departure Order kontra kadagiti tallo tapno saanda a pumanaw iti pagilian bayat a saan pay a nalpas ti proseso ti extradition.
