Nangdutoken ti International Criminal Court (ICC) Pre-Trial Chamber I dagiti medical expert a mangadal ti kondisyon ken kabaelan ni dati a Pres. Rodrigo Duterte a makipaset iti panagdenggeg mainaig iti maipabpabasol kenkuana a crimes against humanity.
Maiabasar ti dokumento a napetsaan iti October 9, imbilin ti ICC ti pannakadutok ti multidisciplinary panel a bukbuklen dagiti eksperto ti forensic psychiatry, neuropsychology ken behavioral neurology tapno maammoan nu adda rikriknaen ti dati a presidente a mabalin a makaapektar iti panagawat ken pannakipasetna iti proseso ti proceedings.
Gagem ti panagadal nga amwen nu maawatan ti dati a presidente ti gagem ken resulta ti kaso, ti ebidensya kontra kenkuana ken nu kabaelanna a mangted ti sarita wenno makikammayet iti trabahona para iti depensarna.
Segun met ti lead counsel ni Duterte a ni Nicholas Kaufman, nakapasar ti dati a presidente ti cognitive deficienciues ken marigatan a makalagip kadagiti pasamak, lugar ken uray iti sumagmamano a miyembro iti kameng ti pamilia ken legal team-na.
Kiniddaw ti kampo ni Duterte ti “indefinite adjournment” wenno temporaryo a pannakapasardeng ti kaso ngem saan nga inawat ti ICC ta madanaganda a mabalin a liklikan ni Duterte iti proceedings gapu ti panagballaagna idi kadagiti testigo ken agtultuloy nga impluwensia iti pamiliana iti pagilian.
