VIGAN CITY- Kinumpirmaran ni dati nga Ilocos Sur Gov. Luis “Chavit” Singson a nabayagen a naited kenkuana ti franchise ti Miss Universe.
Ti interview ti Bombo Radyo Vigan ken ni Singson, naibaga na a nalpasen iti kontrata ti Binibining Pilipinas Charities Inc. (BPCI) ket naipasa kenkuana iti prangkisa isu a masukatanen ti paulo na a Binibining Pilipinas ti “Miss Universe Philippines.”
Nangrugi a napagpatangan iti nasao a katulagan idi immuna a nag-sponsor isuna ti Miss Universe beauty pageant ditoy pagilian idi 2016.
Kinunana, manipud idin ket ti kompanya nan a LCS Group of Companies iti inikkan ti Miss U organization ti pribilehiyo a mangpili ti pagilian a tinawen a pakaisayangkatan ti Miss Universe.
Mainaig dayta, namnamaen ti dati a gobernador a kadagiti sumar-saruno nga aldaw ket pormalen a maipaka-ammo iti pannakaiyallatiw ti prangkisa kenkuana manipud ti Binibining Pilipinas Charities, Inc.
