Saan a palabsen ti kampo ni dati nga Ilocos Sur Governor Chavit Singson dagiti pammabasul ni Atty. Estelita Cordero a ti dati nga opisial ti adda iti likudan ti saan a panangited iti permit dagiti mayor iti kada Local Government Unit para iti operasion ti Small Town Lottery.
Iti pannaki-uman ti Bombo Radyo Vigan ken ni Atty. Edwin Concepcion, legal counsel ni Singson, ti pannakadakamat ti nagan ti dati nga opisial iti daytoy a banag nga awan ti naan-anay nga ebidensia ket maibilang a ‘direct attack’ iti kinatao ti kliyentena.
Impasigurado ni Concepcion a saanda a baybay-an ken tignayanda dagitoy a pammabasul kontra ken ni Singson ta saan a mabalin a pabasulen ti maysa a tao nga awan ti makita nga ebidensia.
Inlawlawag pay ti legal counsel ni Singson nga awan ti impluwensia ti dati nga opisial kadagiti mayor ken awan ti pammutbuteng a mapaspasamak kadakuada.
Malaksid dayta, bigbigen ti kampo nga adda latta turay dagiti LGU, ket ti mayor’s permit ket kasapulan tapno masigurado a ti maysa nga agnegnegosio iti lugar ket sumursurot iti pagallagadan ken awan ti ordinansa a paglabsinganna.
