Nagpangta ni dati nga Ilocos Sur Governor Chavit Singson a mangipila met iti kaso kontra kadagiti mangar-aramid iti kinaulbod kontra kenkuana nangruna dagiti kunana a nagperma iti Warriors ti Ilocos Sur.
Iti pannaki-uman ti Bombo Radyo Vigan ken ni Singson, awan ti pagbutnganna ta awan ti anomalia nga ar-aramidenda, no di ket ad-adda pay a tumured ti riknana gapu iti kinaulbod a maar-aramid kontra kenkuana.
Ibilang pay ni Singson a ti pannakaipila ti kaso kontra kenkuana ket pangdadaelda laeng iti naganna gapu iti naituding a panagtestigona iti Senado mainaig kadagiti ammona iti flood control project.
Nupay kasta, natalek nga apagbiit laeng daytoy a banag ket kiddawna latta nga adda kappia a mapasamak.
Maipalagip a pinilaan ti Warriors ti Ilocos Sur nga idadaulwan ni Atty. Estelita Cordero iti kaso ni Singson ken dagiti dadduma pay nga opisial ti probinsia gapu iti mapapati a saan a husto a pannakaaramat ti pondo manipud iti Tobacco Excise Tax.
