Sumango iti kaso a perjury dagiti dati nga opisyal ti Department of Public Works and Highways (DPWH) no kas bilang ibabawida dagiti sinapataanda a sarita maipanggep iti korapsyon dagiti maanomalya a flood control project kas pinasingkedan ni Senate President Pro Tempore Panfilo Lacson.
Segun ken ni Lacson a chairman iti Senate Blue Ribbon Committee, saanda laeng a madusa iti kaso a perjury ta saan a mapakapsot iti panangibabawida iti saritada kadagiti kaso a mabukbukel kontra kadagiti karaman.
Nakaituding metten a mapasamak iti sumaruno a panagdenggeg iti Blue Ribbon Committee inton January 19.
Kinuna ni Lacson nga uray ibabawi dagiti karaman nga opisyal ti DPWH dagiti saritada ket saan nga insigida a kumapsot iti imbestigasyon iti flood control scandal ta naipresentar kadagiti napalabas a panagdenggeg iti Blue Ribbon Committee dagiti circumstantial ken documented evidence pakairamanan dagiti dokumento iti budget a mainanaig iti sumagmamano a personalidad ken dagiti agpampanday linteg.
Innayonna nga im-imbestigaranen ti Department of Justice(DOJ) ti kaso bayat nga ar-aramiden ti Anti-Money Laundering Council iti panag-freeze kadagiti bank account iti sumagmamano a karaman.
