Impila ti asawa ni Vice President Sara Duterte a ni Atty. Manases Reyes Carpio iti Quezon City Prosecutors Office ti reklamo a kriminal kontra kadagiti opisyal ti Bangko Sentral ng Pilipinas, Anti-Money Laundering Council, ken mangibagi iti House of Representatives.
Ti kangrunaan a kayatna a kasoan ket ni BSP Governor Eli Remolona Jr., AMLC Executive Director Ronel Buenaventura, ken dagiti miembro iti House Justice Committee a da Reps. Gerville Luistro, Percival Cendaña, Chel Diokno, ken Leila De Lima.
Karaman ni Atty. Manases Carpio ti abogado na a ni Atty. Peter Paul Danao iti panagipila iti nasao a kaso.
Segun ti kampo ni Carpio, ti reklamo ket maipanggep ti mapapati a panaglabsing iti Anti-Money Laundering Act, Bank Secrecy Law, ken Data Privacy Act.
Inakusaranna dagiti opisyal nga ilegal nga imbutaktakda ti “classified confidential banking records” a protektado iti linteg.”
