Agpada a nagsagaba iti gasgas iti bagi ti driver ti traysikel ken pasaherona gapu iti pannakatinnagda iti rangtay idiay Paratong, Narvacan, Ilocos Sur idi January 27, 2026.
Iti pannaki-uman ti Bombo Radyo Vigan ken ni PLT. Reynald Ramos a hepe iti Narvacan Municipal Police Station, bayat iti panagawid ti driver ti traysikel ken pasaherona a naggapu iti maysa a pasken ket pinanggep a nag-overtake iti traysikel iti sarsarunwenna a 4-wheels ngem naawanan iti balanse idi nagkabig iti manibelana isu a nagpangato iti side car iti traysikel a gappuanan iti pannakaipanda iti igid a paset ti rangtay.
Segun ken ni Ramos, nairana a naitinnag ti traysikel iti giwang a paset ti rangtay isu a natinnagda iti karayan a rason iti pannakasagrap ti driver ken pasahero ti gasgas iti bagi.
Kinuna ni Ramos a nasaysayaaten a natinnagda iti rangtay pakairamanan iti traysikel ta no naidungparda iti kongkreto a paset iti rangtay ket amangan no nakarkaru iti sinagabada.
Naduktalan nga agpada a naka-inom iti arak dagiti dua idi napasamak iti aksidente ken naammoan nga awan ti driver’s license ti nagmaneho iti traysikel.
Insigida met a naingato ti traysikel ta apaman a natinnag ket adda dagiti umili nga immarayat ket tinalianda ti lugan ket nagtitinnulonganda nga impangato isu a naiyawiden iti akin-kukua.
Balakad ni Ramos kadagiti agmanmaneho nga agbalin nga adal iti nasao a pasamak tapno saan nga agmaneho kangrunaan no adda iti impluwensya iti arak.
