Ad-adalen dagiti otoridad no rugianda iti panagsapul iti Taal Lake ita a lawas iti bangkay dagiti missing sabungeros wenno cockfight enthusiasts a nadukot ken mapapati a natay idi 2021 agingga 2022 kas kinuna ni Justice Secretary Jesus Crispin Remulla.
Maysa kadagiti akusado iti pannakakemmeg dagiti sabungero a ni Julie Dondon Patidongan ti nangibaga a dagiti biktima ket napapatay sumagmamano laeng nga aldaw manipod nadukotda ket imbutaktakna a dagiti bangkayda ket naigalot iti langgusto sakbay a naipan iti lake.
Innaganan ni Patidongan ti negsoyante a ni Atong Ang a mastermind iti kaso ken karaman ni actress Gretchen Barretto iti panagpukaw dagiti sabungero.
Ngem agpadada a nangilibak iti pammabasol a panagpadukot ken pammapatay ket nagipilada pay iti reklamo a robbery ken dadduma pay a kaso kontra ken ni Patidongan.
Kinuna ni Remulla a kiddawenna a marugian ita a lawas iti panagsapul ngem planoenda pay iti maaramid nga addang.
Immunan a nagkiddaw ti Philippine government iti technical assistance manipod Japan ngem agingga ita ket awan pay iti sungbatda.
