Agtultuloy a papapigsaen ti Department of Education (DepEd) ti insigida a rehabilitasyon dagiti pagadalan a nadadael iti Bagyo Inday iti salinong ti Education in Emergency Policy.
Gagem dayta ti DepEd a masigurado ti kinatalged dagiti estudyante ken ti agtultuloy a pannakasursuroda iti baet ti rehabilitasyon ken panagsagana iti didigra.
Segun ti ahensia, umabot iti walopulo ket maysa a classroom iti innem a rehiyon ti nadadael gapu iti bagyo, a ti uppat a pulo ket tallo ket adda damage-na, duapulo iti adda nakaru a pannakadadaelna, bayat nga iver-verify ti DepEd iti sangapulo ket walo a pagtaengan a mapapati a totally damaged.
Naapektaran pay dagiti pagadalan iti sangapulo ket maysa a rehiyon isu a flexible learning modalities pay laeng ti temporaryo nga ipatungpal ti DepEd tapno saan a mataktak iti panagsursuro dagiti estudyante.
Nakaalerto pay ti DepEd iti Negros Island Region idinto a naka-Alert Level 2 ti Bulkang Kanlaon tapno masigurado a nakasagana dagiti pagadalan para iti kinatalged iti amin.
