Kwinestyunaran ni dati a Magdalo Partylist Representative Gary Alejano no pagal-alaan ti Duterte ti minilion a kuarta a pagbaybayadda kadagiti abogado kagiddan ti confirmation charges hearing ita nga aldaw idiay The Hague, Netherlands.
Iti pannaki-uman ti Bombo Radyo Vigan ken ni Alejano, posible nga adu iti napundar ni dati a Pres. Rodrigo Duterte idi agtaktakem pay laeng ngem maikontra met dayta iti ibagbagada a narigatda laeng.
Para ken ni Alejano, malaksid iti “ward chest” a mapapati nga adda ken ni Sen. Bong Go ket adda pay backer-na a kas iti pagilian a China ta investmentda dayta para inton sumaruno nga eleksyon tapno makatugaw manen iti Duterte tapno maitultuloy iti alignment-da iti strategic direction idiay West Philippine Sea ken kontrolen ti polisiya iti Pilipinas.
Inladawanna a no maysa laeng a simple nga umili ket marigatanen iti maysa a kaso a sangsangwenna ta kasapulanna pay iti mapan iti Public Attorneys Office tapno saan a marigatan iti magastos gapu ta nadagsen ti magastos tapno makaala iti abogado.
Dagiti abogado ti dati a presidente ket pakairamanan da Nicolas Kaufman a maysa a British-Israeli lawyer ken ti legal team-na manipod pagilian a da Salvador Medialdea, Martin Delgra III, Silvestre Bello III, Alfredo Lim Jr. Caesar Dulay ken Salvador Panelo.
