Nadunor ti ulo kangrunaan iti paset ti muging ti maysa a construction worker a nagprobokar ta tinagbat ti kalugaranna a nanganawa kenkuana idiay Barangay Paratong, Vigan City, Ilocos Sur idi rabii, February 4, 2025.
Ti biktima ket ni Sonny Boy Andallo Aspa, agtawen iti tallopulo ket tallo ken naasawaan idinto a ti suspek ket ni Celso Javonatilla Amano, agtawen iti duapulo ket pito, baro nga agpada a taga-Paratong, Vigan City.
Iti pannaki-uman ti Bombo Radyo Vigan ken ni PLt. Col. Reynaldo Mendoza Jr. a hepe iti Vigan City Police Station, nagprobokar ti biktima iti natayan iti nasao a lugar isu nga inanawa ti suspek ngem saan a dimngeg ti biktima isu a kellaat a napan nangala ti suspek ti wasay nga agrukod iti tallopulo a pulgada manipod apputanna nga isu ti inaramatna a pinangtagbat ti biktima.
Segun ken ni Mendoza, babaen kadagiti barangay official a nagresponde ket insigida a naipan iti Ilocos Sur Provincial Hospital – Gabriela Silang ti biktima para iti pannakatamingna idinto a ti suspek ket kinammeg dagiti pannakabagi ti linteg.
Kinuna ni Mendoza a saan unay a nakaru ti nasagrap ti biktima ta ti naitama iti ulona ket tay saan unay a natadem a paset ti wasay.
VIDEO – PLT. COL. REYNALDO MENDOZA JR.
Kabayatanna, pinasingkedan ni Barangay Captain Benjamin Anyog manipod Barangay Paratong, Vigan City a dati a parikotda ti biktima iti lugarda ta nu maka-inom ket agprobokar latta.
Kinunana nga adda pay gundaway a pinapanawda idi iti lugarda gapu iti kanayonna a panagprobokar ket iti lugar a napananna, saanda met laeng a naanusan gapu iti ugali na nu makainom isu a nagsubli iti barangayda.
Nupay kasta ket kinuna ti kapitan nga awan ti rekord iti barangayda ti suspek isu a posible a saan laeng a nakapagteppel ta saanna a naanawa ti biktima.
VIDEO – BARANGAY CAPTAIN BENJAMIN ANYOG
