VIGAN CITY- Dakkel a karit para kadagiti opisyal ti barangay iti baro a mandato ti Department of Interior and Local Government kontra kadagiti opisyal ti barangay a saan nga aktibo a makipaset iti kampanya ti gobierno kontra ti iligal a droga.
Segun kenni Brgy. Capt. Percival Vicencio, presidente ti Association of Barangay Captains ti Bantay, saan a nalaka iti panangbantay kadagiti amin a bumaranggay nangruna kadagiti agkaskasera laeng.
Nupay kasta, nakasagana a sumurot dagiti opisyal ti barangay iti baro a mandato gapu ta awan iti siasinoman iti mangayat nga idauluan iti maysa a barangay a nagulo ken nakaro iti parikut iti iligal a droga.
Immunan a binalaagan ti DILG dagiti opisyal ti barangay a kasapulan a madalusan ti barangay da manipud iti iligal a droga aginnga iti uppat a pulo a porsyento ta no saan ket makasuan da ti neglect of duty ken maikkat iti serbisyo.
Mainaig iti daytoy, suportado ni Police Chief Insp. Rodel Ularte, hepe ti PNP-San Ildefonso, iti baro a mandato ta obligasyon dagit barangay officials a makipaset iti kampanya ti gobierno kontra ti iligal a droga kas pammilin ni Presidente Rodrigo Duterte.
