VIGAN CITY- Pinatalgedan ni Police Inspector Roldan Rasonable ti Sugpon municipal police station a nabigbig dan ti akinkukua kadagiti pagmulaan ti marijuana a naduktalan da idiay Barangay Licungan, Sugpon a nakaalaan da ti 3.6 a milyon a pisos a gatad ti marijuana, ngem saan na pay nga inbuksilan ti nagan ti suspek.
Segun kenni Rasonable, adda ti iggem da a warrant of arrest kontra ti suspek iti kaso nga adda pakainaigan na iti iligal a droga ngem saan da a nadanun idi insayangkat da ti operasyon.
Innayonna a ti pannakaduktal da ti pagmulaan ket babaen kadagiti impormasyon a naawat da kadagiti concerned citizen.
Maipalagip a ti operasyon ket pinarut dagiti otoridad ti sangapulo ket dwa a ribo a piraso ti fully grown marijuana ken nakaala da pay ti tallo a ribo a gramo ti marijuana stalks ken sangapulo a ribo a bin-I ti marijuana.
