Pimmusay ti maysa a menor de edad idinto a masapsapul ti amana ta nalmesda iti kabaybayan idiay Barangay Calay-ab, Sto. Domingo, Ilocos Sur itay 2:15 PM (September 28, 2024).
Ti pimmusay ket agtawen iti sangapulo ket innem idinto a ti ama ket ni Rowell Morondoz Paat, agtawen iti tallopulo ket pito, naasawaan nga agpada nga agnaed idiay Quezon City.
Iti pannaki-uman ti Bombo Radyo Vigan ken ni Ensign Jayvee Bilgera nga spokesperson iti Philippine Coast Guard – Ilocos Sur, nakaawatda iti report inaig iti mapapati a pannakalmes dagiti agama iti nasao a kabaybayan isu a nagrespondeda ket bayat iti panangsapulda, maysa a kabarbaro a tropada a nakabakasyon iti nakaalaw iti menor de edad isu nga intarayda iti Northside Doctors Hospital – Bantay para koma iti pannakatamingna ngem naideklarar a dead on arrival kas kinuna ti attending physician-na.
Segun ken ni Bilgera, saan ay laeng a nasarakan ni Rowell ta iti agdama ket insardeng pay laeng dagiti rescuer iti seaport operation gapu iti napigsa nga angin ken saan a nasayaat a panniempo.
Naamoan a napan dagiti biktima iti nasao a kabaybayan tapno iselebrar koma iti panagkasangay ti menor de edad ngem isu metten iti pannakalmesda nga agama.
Nupay kasta ket nabagaanen dagiti kabangibang nga ili para iti panangisayangkatda iti inoras a panagpatrolya iti igid iti baybay para iti possible a pannakasapul ken ni Rowel.
