Indiaya ti Federal Bureau of Investigation (FBI) iti agingga $25,000 a reward para iti makaited ti impormasyon tapno makemmeg ti maysa a Pilipino nga akusado iti kaso nga online exploitation dagiti menor de edad.
Iti nairuar a wanted poster, nabigbig ti akusado a ni Austin Jan Sy Yatco, alyas “Hairy Lips”, agtawen iti duapulo ket walo, Filipino national a naipasngay idiay San Pedro, Laguna.
Segun ti FBI, wanted ni Yatco maipanggep iti mapapati a pannakairaman iti exploitation dagiti menor de edad manipod 2019 agingga 2021 kas paset iti maysa nga online group nga aktibo ti gaming ken social media platforms.
Sumangsango ni Yatco iti federal arrest warrant nga inruar ti United States District Court for the Eastern District of New York idi Enero 23.
Nakasoan isuna ti sexual exploitation of children, material involving sexual exploitation of minors, ken certain activities related to material constituting or containing child pornography.
Kinuna dagiti otoridad nga adda pakainaigan ni Yatco idiay Plano, Texas ken iti Pilipinas a mapapati a pagnanaedanna iti agdama.
