Posible a maipasidong iti kustodiya ti US Marshals ni Pastor Quiboloy no kas pangarigan palubosan ti gobierno ti Pilipinas ti extradition-na idiay Amerika.
Daytoy ket kalpasan a kinumpirmaran ni Philippine Ambassador to the US Jose Manuel “Babe” Romualdez a nangipatuloden ti pormal nga extradition request ti gobierno ti Amerika iti Pilipinas.
Inlawlawag ni Ambassador Romualdez no kasano nga alaen ti US Marshals ni Quiboloy no sadino adda bukod nga eroplano ti US Marshal nga umay dituy Pilipinas tapno sundoen ni Quiboloy.
Manipud dituy pagilian, mai-biahe isuna a direkta a mapan iti partikular a lugar iti Amerika no sadino maipila dagiti kaso idiay Los Angeles.
Kalaksidan iti US Marshals, mabalin a makadua iti operasion dagiti ahente ti Federal Bureau of Investigation tapno masigurado ti napardas a panagiyakar iti kustodiya ti Amerika.
