Agpapada a nadunor dagiti lima a menor de edad a naglugan iti traysikel ken maysa a nagmaneho iti motorsiklo gapu iti panagdinnungparda iti provincial road idiay Barangay Orence, Narvacan, Ilocos Sur itay parbangon, March 28, 2026.
Ti nagmaneho ti Honda TMX tricycle ket lalaki nga agtawen iti sangapulo ket pito, grade 12 student nga agnaed idiay Barangay San Jose, Narvacan kaduana dagiti uppat a menor de edad nga inluganna.
Ti nagmaneho met iti Black Yamaha Mio motorcycle ket lalaki nga agtawen iti duapulo ket lima a taga-Barangay Dinalaoan, Narvacan.
Iti imbestigasyon ket naammoan nga agpapabagatan a direksyon ti traysikel idinto nga adda iti bangir a linya iti motorsiklo idin napasamak iti panagdinnungparda.
Amin a naglugan iti traysikel ken ti nakamotor ket nagsagaba iti dunor isu a naipanda iti Ilocos Sur District Hospital, Narvacan para iti pannakatamingda.
