Agpapada a nadunor dagiti uppat a lallaki gapu iti panagdinnungpar dagiti dua a motorsiklo idiay Barangay Immayos Norte, San Juan, Ilocos Sur idi rabii, March 8, 2026.
Ti nagmaneho iti black Honda Click 125 ket agtawen iti tallopulo a taga-Barangay Manzante, Magsingal a holder iti Non-Professional Driver’s license kaduana ti backrider nga agtawen iti duapulo ket lima, nurse a taga-Barangay Pagsanaan Sur nga agpada a nakaaramat iti helmet ken reflectorized vest.
Ti met nagmaneho iti Red Suzuki Raider ket agtawen iti duapulo ket dua, construction worker, awanan ti driver’s license nga agnaed idiay Barangay Bacsil, San Juan ken backrider-na nga agtawen iti tallopulo ket maysa, construction worker nga agnaed idiay Barangay Baliw, San Juan nga agpada a saan a nagaramat iti helmet ken reflectorized vest.
Agpapabagatan a direksyon dagiti nagkalugan iti Honda Click idinto nga adda iti bangir a direksyon ti Raider idin nadanonda iti nasao a lugar ket immagaw ti Raider iti linya iti Honda Click a gappuanan iti panagdinnungparda.
Agpada a nagasgasan dagiti nagkalugan iti Honda Click idinto a na-fracture iti akin-kannigid a takyag ken nadunor iti agduduma a paset ti bagi ti nagmaneho iti Raider ken ti kaduana ket nagpasa iti mugingna.
Naipan iti Pira General Hospital dagiti nagkalugan iti Raider idinto a dagiti nagkalugan iti Honda Click ket naipan iti Ilocos Sur District Hospital, Magsingal para iti pannakatamingda.
Naammoan a ti driver ti Raider ken kaduana ket naka-inom iti arak idi napasamak iti aksidente.
