Nanayunan pay iti tallopulo ket maysa iti nairekord a kaso ti stroke, atake iti puso ken asthma iti pagilian ita nga aldaw kas pinasingkedan ti Department of Health.
Umaboten iti 288 ti kaso a nairekord manipod December 21 kadagiti sangapulo a pilot sites a bambanbatayan iti ahensya a nangatngato iti 5% kumparar iti isu met la a panawen idi 2024 nga umabot iti 274 a kaso.
Nairekord iti pitopulo ket pito a kaso iti atake iti puso, 180 a kaso iti stroke, ken tallopulo ket maysa a kaso iti asthma.
Manipod kadagiti nasao a kaso ket duapulo ket walo iti kaso ti atake ti puso ken limapulo ket tallo iti kaso ti stroke kadagiti agtawen iti innem a pulo agingga innem a pulo ket siam idinto a walo a kaso ti asthma kadagiti ubbing a zero agingga 9 years old.
Umabot payen iti lima ti natay, tallo iti na-strike ken dua iti naatake iti puso.
Nagpalagip ti DOH iti publiko a liklikan ti napalus a pannangan, panagsigarilyo, panaginom iti arak ken stress.
