Pinasingkedan ti Department of Justice (DOJ)a posible a maibaba ti pannusa nga ipataw iti korte iti kontratista a ni Sarah Discaya iti kaso a sangsangwenna maipanggep ti flood control.
Segun ken ni Prosecutor General Richard Anthony Fadullon, ti boluntaryo a panagsuko ni Discaya iti National Bureau of Investigation (NBI) ket mabalin nga ikonsiderar ti korte maipanggep iti maipataw a pannusa.
Ti boluntaryo a panagsuko ket maibilang a maysa a “mitigation circumstance” wenno pagbasaran a maibaba ti sentensya a posible a sangwen ti kontratista.
Innayon ni Prosecutor General Fadullon a ti isusuko iti hurisdiksyon iti korte ket panangipakita a saan a pananguray pay iti panangiruar ken panangiserbi ti warrant of arrest.
Maipalagip a ni Discaya ket boluntaryo a simmuko iti kustodiya iti National Bureau of Investigation idi December 9.
