Immapela ti Volunteers Against Crime and Corruption ken ni Presidente Ferdinand Marcos Jr a palawaen pay ti panawaganna para iti courtesy resignation.
Iti pannaki-uman ti Bombo Radyo Vigan ken ni Arsenio ‘Boy’ Evangelista, saan laeng a dagiti miembro ti gabinete ti karaman iti panawagan no di ket uray dagiti lider ti government-owned and controlled corporation a nainaig iti kontrobersya kas ti Philippine Charity Sweepstakes Office (PCSO), Philippine Amusement and Gaming Corporation (Pagcor), ken Bureau of Customs (BOC).
Patien ni Evangelista a nasken nga agikkat ti lider dagiti ahensia nga agsaysayang iti pondo ken saan a mangtungtungpal iti pagrebbenganda nangruna kadagiti umili.
Nupay kasta, ‘welcome move’ latta para iti VACC ti addang uray no nabayag koma payen a binalasa ti presidente ti gabinetena tapno maamuan no asino dagiti underperforming official.
