Agkadua a pimmanaw iti Senate compound da Senador Ronald “Bato” dela Rosa ken Senador Robinhood Padilla kalpasan iti nagsasaruno a panagpaputok iti maikadua a kadsaraan iti pasdek idi rabii iti May 13.
Segun ken ni Senate Sergeant-at-Arms Mao Aplasca, makita iti CCTV footage ken dagiti report ti Senate security a magmagna dagiti dua a senador nga agturong iti lugan ni Padilla.
Kinuna ni Aplasca a kasla saan nga inlimed dagiti dua a senador iti ipapanawda.
No pay kasta ket mangisayangkatda latta iti imbestigasyon no apay a saan ida a kinasarita wenno linapdan dagiti nakadeploy a security personnel.
Binasa ni Senate President Alan Peter Cayetano ti immunan a report nga idi alas dos y media iti parbangon idi naipakaammo kenkuana ti Office of the Sergeant-at-Arms iti ipapanaw ti dua nga opisyal.
Inlawlawag met ni Cayetano nga awan ti legal a pagbasaran dagiti opisyal iti Senado tapno lapdan ti senador a rumuar ti premises uray pay dimmalan ti protective custody.
Kabayatanna personal nga iver-verify ti Senate President ti nasao nga impormasyon.
