Kinumpirmaran ti Department of Justice (DOJ) a naawatdan ti reklamo nga obstruction of justice maipanggep ti insidente iti Senado idi Mayo.
Segun ken ni DOJ Undersecretary Ian Norman Dato, August 11 idi naipila ti reklamo iti Philippine National Police (PNP).
Nagkedked pay laeng a mangted iti dadduma a detalye ti opisial pakairamanan no siasino dagiti indibidual a karaman a napilaan ti reklamo.
Idi napan a bulan idi impakaammo ti Justice Department nga agtultuloy ti case build-up iti reklamo nga obstruction of justice nga impila ti Philippine National Police – Criminal Investigation and Detection Group (PNP-CIDG) kontra ken ni Sen. Robin Padilla.
Ti addang ket adda pakainaigan ti panagtulong ti senador tapno makapanaw iti Senado ni Sen. Ronald “Bato” dela Rosa nga adda arrest warrant-na manipod iti International Criminal Court (ICC).
