Saanen nga agipila ti kaso ti lalaki a natagbat babaen ti kabsatna idiay San Julian Norte, Vigan City, Ilocos Sur.
Ti biktima ket lalaki nga agtawen iti uppat a pulo, construction worker idinto a ti suspek ket ti kabsatna a lalaki nga agtawen iti uppat a pulo ket lima, construction worker, agpada nga agnaed iti nasao a lugar.
Iti pannaki-uman ti Bombo Radyo Vigan ken ni PLt. Col. Reynaldo Mendoza Jr. iti Vigan City Police Station, nagipilan ti biktima iti affidavit of desistance kontra iti suspek a kabsatna ta patienna a napasamak laeng iti pannagbat gapu iti epekto iti bartekda.
Segun ken ni Mendoza, idi March 15 iti rabii ket simmangpet ti biktima a naka-inom iti arak ket nasangpetanna ti suspek a naka-inom met laeng isu nga adda iti saanda a nagkinnaawatan a gappuanan ti panangtagbat ti suspek iti kabsatna.
Nagsagaba iti dunor iti ulo ti biktima isu a naipan iti Metro Vigan Cooperative Hospital para iti pannakatamingna ket dagus met laeng a nakaruar ta saan unay a nakaru ti sinagaba.
Balakad ni Mendoza kadagiti agin-inom iti arak nga ipan iti tiyan ket saan nga ipan iti bara iti ulo tapno awan iti maisagmak.
