Nagasgasan iti akin-kanigid a saka ti nagmaneho iti maysa a traysikel ta natinnag iti rangtay kalpasan a dinungpar iti maysa nga L300 van iti Barangay Road, Barangay San Isidro, Candon City, Ilocos Sur.
Segun ti Candon City Police Station, ti nagmaneho iti Motoposh Pinoy 155 nga adda sidecar-na ket agtawen pitopulo ket walo a lalaki nga agnaed idiay San Isidro, Candon City idinto a ti nagmaneho iti Mitsubishi L300 C/C ket agtawen iti tallopulo ket pito, naasawaan nga agnaed idiay Barangay 24, San Nicolas, Ilocos Norte ken ti helper-na nga agtawen iti tallopulo nga agnaed idiay Cagrunaan, Batac City, Ilocos Norte.
Iti inisyal nga imbestigasyon, nakaparking ti traysikel iti bagatan a paset iti kalsada a nakasango iti laud idin ta dimteng ti L300 van manipod daya a direksyon a napaspas iti patarayna ket mapapati a naawanan iti kontrol iti manibelana ken aksidente a naidungpar iti nakaparking a traysikel a gappuanan iti pannakaitinnag ti traysikel iti umabot dua a metro manipod iti rangtay idinto a ti L300 van ket dandani natinnag.
Gapu iti gasgas ti nagmaneho iti motorsiklo ket impaayan dagiti personnel iti Bureau of Fire Protection iti first aid iti nasao a nakapasamakan iti aksidente idinto a saan a naan-ano dagiti nakalugan iti L300 van.
Amin a karaman iti aksidente ket naipan iti Ilocos Sur Medical Center, Candon City para iti medical examination.
