Idurduron ni Akbayan Party-list Rep. Chel Diokno a mangisayangkat ti House of Representatives ti “energy review” ken imbestigasyon iti mapaspasaran a “rotational brownouts” gapu ti red ken yellow alerts kadagiti power grid iti pagilian.
Saan a maawat ni Dioko nga iti baet iti nabara a panawen ket rinibo a tattao iti agsagsagaba ken madanagan a maawanan iti kuryente.
Segun ken ni Diokno, rumbeng a maimbestigaran tapno maammoan iti pagtataudan ti parikot ken no adda palya iti energy agencies, National Grid Corporation of the Philippines wenno NGCP ken power producers.
Immunan nga impila ni Diokno ken dadduma pay a kongresista idi napan a bulan ti House Resolution 875 a mangidurduron nga adalen iti panangidaulo ti House Committee on energy ti Philippine Energy Plan.
Kinuna ni Diokno a gagemda a siguradoen nga umdas ti suplay ti kuryente, papigsaen ti renewable energy ken kissayan ti panagdepende iti imported fuel.
